အီသီယိုးပီးယားနိုင်ငံမှာ လူ ၇ သန်းနီးပါးဟာ မိုးခေါင်ရေရှားတဲ့ဒဏ်ကို ပြင်းပြင်းထန်ထန် ခံစားနေကြရပြီး တိရစ္ဆာန်အများအပြားလည်း ရေနဲ့ အစားအစာ ပြတ်လပ်နေလို့ သေဆုံးနေကြရပါတယ်။

အစိုးရကယ်ဆယ်ရေး အထောက်အပံ့ကို မှီခိုဖို့ ပြည်သူအများအပြား ရွှေ့ပြောင်းဒုက္ခသည် စခန်းတွေဆီကို ဦးတည်သွားခဲ့ရပါတယ်။

ဒေသခံ ၈၀ ရာခိုင်နှုန်းက မွေးမြူရေးလုပ်ငန်းကို အားကိုးနေရတဲ့ ဆိုမာလီပြည်နယ်ကတော့ ဆုံးရှုံးမှု ကြီးကြီးမားမား ခံရတဲ့ ဒေသတွေထဲက တခုပါ။

မွေးမြူရေး တိရစ္ဆာန်အကောင်ရေ တသန်းကျော် သေဆုံးခဲ့တယ်လို့ ဒေသခံ ကပ်ဘေးစီမံခန့်ခွဲရေးဗျူရိုက ပြောပါတယ်။

လွန်ခဲ့တဲ့ ၂ လခွဲလောက်က ဂိုဒေမြို့နားက ရပ်ကွက်ဆီကို အနားဝန်းကျင်က တိရစ္ဆာန် ထိန်းကျောင်းသူတွေ အုပ်လိုက် ရွှေ့ပြောင်းလာခဲ့ကြရတာပါ။

အစိုးရကထောက်ပံ့တဲ့ ရေနဲ့ စားနပ်ရိက္ခာ ရရှိရေး မျှော်လင့်ချက်နဲ့ ရောက်လာတဲ့ မိသားစု အရေအတွက် ၄၀၀ ကနေ ၂,၂၀၀ ကျော်ထိ တိုးလာခဲ့တယ်လို့ စီစီတီဗွီ သတင်းဌာနက ကြေညာပါတယ်။