မြောက်ကိုရီးယားရဲ့ မဆင်မခြင် ဒုံးကျည်စမ်းသပ်မှုနဲ့ နျူးကလီးယားလက်နက် အစီအစဉ်အတွက် မြောက်အတ္တလန္တိတ် စစ်ရေးမဟာမိတ်အဖွဲ့ (နေတိုး) က စိုးရိမ်နေပြီး ယူကရိန်းစစ်ပွဲဟာ အာရှအတွက် အကျိုးသက်ရောက်မှုတွေ ရှိနေတယ်လို့ နေတိုးအတွင်းရေးမှူးချုပ် ယန်း စတော့တန်ဘာ့ဂ်က တောင်ကိုရီးယား နိုင်ငံခြားရေးဝန်ကြီး ပတ်ခ်ဂျင်ကို ဇန်နဝါရီ ၂၉ ရက်မှာ ပြောလိုက်ပါတယ်။

“မြောက်ကိုရီးယားက ရုရှားရဲ့ စစ်ရေးကြိုးပမ်းမှုတွေအတွက် ရော့ကဒ်နဲ့ မစ်ဇိုင်းဒုံးကျည်တွေကို စစ်ရေးအရ ပံ့ပိုးပေးနေတယ်ဆိုတာ သိပါတယ်။ ဒါက သူတို့ အပြန်အလှန် ချိတ်ဆက်ပုံကို မီးမောင်းထိုးပြနေတယ်” လို့ တွေ့ဆုံမှုအစမှာ စတော့တန်ဘာ့ဂ်က ပြောပါတယ်။

မြောက်ကိုရီးယားအစိုးရက ရုရှားစစ်ပွဲအတွက် ကြိုးပမ်းမှုတွေကို စစ်ရေးအရ ထောက်ပံ့နေတယ်ဆိုတဲ့ စွပ်စွဲချက်တွေကိုလည်း ကိုးကား ပြောဆိုခဲ့ပါတယ်။

အာရှ-ပစိဖိတ်ဒေသမှာ နေတိုးပါဝင်ပတ်သက်မှုက ဥရောပရဲ့ ပြင်းထန်တဲ့ ပဋိပက္ခတွေကို တင်သွင်းလာလိမ့်မယ်လို့ မြောက်ကိုရီးယားက ပြောပါတယ်။

ယူကရိန်းစစ်ပွဲအတွက် မြောက်ကိုရီးယားက လက်နက်တွေ ထောက်ပံ့ပေးနေတယ်ဆိုတဲ့ အမေရိကန်ရဲ့ စွပ်စွဲချက်ကို မြောက်ကိုရီးယားနဲ့ ရုရှားတို့က ငြင်းဆိုထားပါတယ်။

စတော့တန်ဘာ့ဂ်ဟာ တနင်္ဂနွေနေ့ အစောပိုင်းမှာ တောင်ကိုရီးယားနိုင်ငံကို ရောက်လာခဲ့ပြီး ဂျပန်အပါအဝင် သူ့ခရီးစဉ်အတွင်း ပထမဆုံးရောက်တဲ့နိုင်ငံလည်း ဖြစ်ပါတယ်။

သူ့ခရီးစဉ်အတွင်း ယူကရိန်းစစ်ပွဲမှာ အမေရိကန် မဟာမိတ်တွေနဲ့ ဆက်ဆံရေး ခိုင်မာစေဖို့နဲ့  တရုတ်နဲ့ ပြိုင်ဆိုင်မှု မြင့်တက်လာစေဖို့ ရည်ရွယ်ထားတယ်လို့ ရိုက်တာသတင်းဌာနက ကြေညာထားပါတယ်။