မန်ယူနိုက်တက်အသင်းအနေနဲ့ ထိပ်ဆုံး ၄ သင်းစာရင်းဝင်ဖို့ ခက်ခဲသွားပြီဖြစ်တယ်လို့ နည်းပြ ရက်ဖ်ရင်းနစ်ခ်က ဝန်ခံစကားဆိုသွားပါတယ်။ 

မနေ့ညက ဆောက်သမ်တန်နဲ့ အိမ်ကွင်းမှာ တစ်ဂိုး စီသရေကျပြီးတဲ့နောက်မှာ အသင်းရဲ့အခြေအနေက အဆင့်လေးဝင်ဖို့ ခက်ခဲသွားပြီလို့ ရင်းနစ်ခ်က  ပြောခဲ့တာပါ။ 

မန်ယူအသင်းဟာ ပရီးမီးယားလိဂ် ၂၄ ပွဲကစားအပြီးမှာ ၁၁ ပွဲနိုင် ၇ ပွဲသရေ၊ ၆ ပွဲရှုံးရလဒ်နဲ့ အမှတ်ပေးဇယားအဆင့် ၅ နေရာမှာ ရပ်တည်နေပါတယ်။ ဒါပေမဲ့ အဆင့် ၆ က အာဆင်နယ်၊ အဆင့် ၇ က စပါးနဲ့ အဆင့် ၈ က ဝုဗ်အသင်းတွေဟာ မန်ယူအသင်းထက် ၂ ပွဲကနေ ၃ပွဲအထိ ကစားရဖို့ ကျန်သေးတာပါ။ 

ဒီအခြေအနေက ရာသီအကုန်မှာ အဆင့်လေးအတွင်းဝင်ဖို့ ခက်ခဲလိမ့်မယ်လို့ နည်းပြရင်းနစ်ခ်က ပြောပါတယ်။ 

“အဆင့်လေးအတွင်း ဝင်ဖို့ ခက်ခဲသွားတာ အမှန်ပါပဲ။ ဒီပွဲက ကစားပြီးခဲ့တဲ့ ၅ ပွဲ ၆ ပွဲလောက်မှာ ၁ ဂိုး ဒါမှမဟုတ် ၂ ဂိုးသွင်းပြီးမှာ သရေကျခဲ့ရတဲ့ စတုတ္ထမြောက်ပွဲစဉ်ဖြစ်ခဲ့တယ်။ ဒါကြောင့် ဗီလာ၊ ဘန်လေပွဲတွေနဲ့ပါ ရေတွက်ကြည့်ရင် ၆ မှတ်ဆုံးရှုံးခဲ့ရတယ်။ ဒါက စိတ်ပျက်စရာကောင်းပေမယ့် အဲဒါကအသင်းကို ကူညီနိုင်မှာ မဟုတ်လို့ လာမယ့်ပွဲစဉ်တွေအတွက် အကောင်းဆုံးပြင်ဆင်ဖို့ပဲရှိပါတယ်။” 

ယူနိုက်တက်အသင်းသားတွေအနေနဲ့ ဖိအားတွေကြောင့် တည်ငြိမ်မှုပျောက်ဆုံးနေပြီး အဲဒီအပိုင်းမှာလည်း ပိုကောင်းဖို့ လိုအပ်ကြောင်း နည်းပြရင်းနစ်ခ်က ပြောသွားပါတယ်။