စစ်ကိုင်းတိုင်း၊ ယင်းမာပင်ခရိုင်၊ ယင်းမာပင်မြို့နယ် ​နှော​ရိုး​ကျေးရွာ ဘုန်း​တော်ကြီး​ကျောင်းမှာ စစ်​ရှောင်​နေတဲ့ ပြည်သူအချို့နဲ့ ​ကျောင်းထိုင်ဆရာ​တော်ကို စစ်​ကောင်စီတပ်က မတ် ၂၃ ရက်နေ့ မနက် ၇ နာရီလောက် ဖမ်းဆီး​ခေါ်​ဆောင်သွားတယ်လို့ ​ဒေသခံ​တွေက ​ပြောပါတယ်။

ယင်းမာပင်မြို့နယ်မှာ တိုက်ပွဲတွေနဲ့ စစ်ကောင်စီတပ်က နေအိမ်တွေ မီးရှို့ဖျက်ဆီးတာတွေကြောင့် ​ကျေးရွာ ဘုန်း​တော်ကြီး​ကျောင်းမှာ စစ်ရှောင်နေတဲ့ အမျိုးသား ၇ ဦးနဲ့ ကျောင်းထိုင်ဆရာတော်ကို ဖမ်းဆီးသွားတာလို့ ဆိုပါတယ်။

မတ် ၂၄ ရက် မနက်ပိုင်းမှာတော့ ဆရာတော်အပါအဝင် ၈ ဦးကို  ယင်းမာပင်မြို့ဘက် ​ဖမ်းဆီး​ခေါ်​ဆောင်သွားတယ်လို့ ​ဒေသခံတဦးက ​ပြောပါတယ်။

စစ်​​ကောင်စီတပ်ဟာ မတ် ၂၃ ရက်က ​နှောရိုး​ကျေးရွာအတွင်းကို ​ဝင်ရောက်ရှိလာခဲ့တာဖြစ်ပြီး ​ကျေးရွာအတွင်းက​နေ အခြား​ကျေးရွာ​တွေဘက်​ကို လက်နက်ကြီးတွေနဲ့ ရမ်းသမ်းပစ်ခတ်တာကြောင့် ရွာသာယာ​ကျေးရွာအတွင်းကိုလည်း လက်နက်ကြီးကျည် ကျ​ရောက်​ပေါက်ကွဲခဲ့ပြီး ထိခိုက်ဒဏ်ရာရသူတော့ မရှိဘူးလို့ ​ဆိုပါတယ်။ 

စစ်​ကောင်စီတပ်​တွေ ဝင်​ရောက်လာတာ​ကြောင့် ရွာသာယာ​ကျေးရွာအပါအဝင် အခြားနီးစပ်ရာ​ကျေးရွာတွေက ပြည်သူ​တွေ ​တိမ်း​ရှောင်ထွက်​ပြေး​နေကြရတယ်လို့ ဒေသခံက ပြောပါတယ်။

ယင်းမာပင်မြို့နယ် ကျေးရွာတွေအတွင်း စစ်​ကောင်စီတပ်​တွေ ဝင်ရောက်ကာ ပြည်သူတွေကို ဖမ်းဆီးတာ၊ သတ်ဖြတ်တာ၊ နေအိမ်တွေ မီးရှို့တာ၊ ပစ္စည်းတွေကို ယူဆောင်တာတွေ ပြုလုပ်နေတာကြောင့် ​ဒေသခံပြည်သူ​ပေါင်း ​သောင်းချီ ထွက်​ပြေးတိမ်း​ရှောင်​နေကြရပြီး စားဝတ်နေရေး အခက်အခဲ ကြုံနေကြရတယ်လို့ ​ဒေသခံ​တွေက ​ပြောပါတယ်။