မကွေးတိုင်း၊ မြိုင်မြို့နယ်မှာ ဇူလိုင် ၁၃ ရက် မနက်က ပြည်သူတွေတူးဖော်ထားတဲ့ ရေနံတွင်း ၁၀၂ တွင်းကို တရားမဝင်ဘူးဆိုပြီး မီးရှို့ဖျက်ဆီးခဲ့တယ်လို့ စစ်ကောင်စီရဲ့ ဝါဒဖြန့်မီဒီယာတွေမှာ ဖော်ပြထားပါတယ်။

မြိုင်မြို့နယ်နဲ့ ပေါက်မြို့နယ်အစပ်က ရေနံမှော်တွေမှာ ဇူလိုင် ၁၃ ရက် မနက်ပိုင်းက စစ်ကောင်စီတပ်အင်အား ၁၀၀ လောက်စစ်ကြောင်းထိုးပြီး ပြည်သူတွေ တူးဖော်ထားတဲ့ ရေနံတွင်းတွေကို မီးရှို့ဖျက်ဆီးခဲ့ကြတာလို့ ကြက်ဆူအိုင်ရေနံမှော်က ရေနံတွင်းပိုင်ရှင်တဦးက ဒီဗွီဘီကို ပြောပါတယ်။

“စစ် (-) တွေကတော့ တရားမဝင်မှော်ဆိုတဲ့ အကြောင်းပြချက်နဲ့ မီးရှို့ဖျက်ဆီးကြတာပေါ့။ ဒီရေနံတွင်းတွေဟာ ပြည်သူတွေရဲ့ ချွေးနှဲစာတွေနဲ့ စုပေါင်းစပ်ပေါင်း ရင်းနှီးမြှုပ်နှံထားကြရတာ။ ရေနံလုပ်ငန်းဟာ အစိုးရအဆက်ဆက် တရားဝင်ဖြစ်ဖိုဆိုတာလည်း မလွယ်ကူပါဘူး။ တရားဝင် လုပ်ကွက်ဆိုတဲ့ နေရာတွေဟာလည်း ရေနံတစက်မှ မထွက်ဘဲ သယ်ယူခွင့်မျှောစာရွက်ပဲ ထွက်ရှိတာပါ။ စစ်ခွေးတွေ အာဏာသိမ်းပြီးတဲ့နောက်ပိုင်းမှာ ရေနံလုပ်ငန်းတခုလုံး ပျက်စီးတော့တာပဲ။”

ရေနံတွင်း တတွင်းကို သိန်း ၂၀၀ ကျပ်လောက်အထိ ရင်းနှီးမြှုပ်နှံကြရပြီး နေ့စဥ်ဆီထွက်နေတဲ့ ကျင်းတကျင်းရဲ့ တန်ဖိုးဟာ ကျပ်သိန်း ၄၀၀ ကနေ ၁၀၀၀ လောက်အထိပေါက်စျေးရှိလို့ ကျပ်သိန်းပေါင်း ၄၀၀၀၀ နဲ့အထက် ဆုံးရှုံးခဲ့ရတယ်လို့ ဆိုပါတယ်။

မြိုင်မြို့နယ်မှာ ၂၀၂၂ ခုနှစ် ဇူလိုင် ၈ ရက် မွန်းလွဲပိုင်းကလည်း စစ်ကောင်စီတပ်သားတွေက ကျောက်ခွက်ရေနံမှော်ကို မီးရှို့ဖျက်ဆီးခဲ့လို့ ရေနံတွင်း ၃၇ တွင်းလောက် မီးလောက်ဆုံးရှုံးခဲ့တယ်လို့ ဒေသခံတွေက ပြောပါတယ်။

မြိုင်မြို့နယ်နဲ့ ပေါက်မြို့နယ်အစပ်မှာရှိတဲ့ ရေနံမှော်တွေနဲ့ ဆီခြံတွေကို ၂၀၂၂ ခုနှစ် ဇန်နဝါရီ ၁၆ ရက်မှ ၂၆ ရက်အထိ စစ်ကောင်စီတပ်တွေ ဝင်ရောက်မီးရှို့ ဖျက်ဆီးခဲ့လို့ ကျပ်သိန်းပေါင်း သိန်းနဲ့ချီဆုံးရှုံးခဲ့တယ်လို့ သိရပါတယ်။