İlham Hüseyn
Gələcək nəsillər bu günün Aəzrbaycanı haqqında maraqla oxuyacaqlar. Bu dövrlə bağlı filmlər çəkiləcək, kitablar yazılacaq. Bütün bu yaradıcılıq məhsullarının əsas “qəhrəman”ı mövcud rejim olacaq. Heç kim bu tarixi saxtalaşdıra bilməyəcək. Çünki hadisələr informasiya bolluğu dövründə baş verir.
Hamı görür və bilir ki, hakimiyyət bütün resursların AXCP-yə qarşı yönəldib. Partiya sədri ətraf aləmdən təcrid edilib, repressiyalar dayanmır, AXCP-ni gözdən salmaq üçün bütün iyrəncliklərə əl atılır, partiya funksionerləri kibercinayətkarlıqla üz-üzə qalıb və s.
Rejim AXCPfobiya xəstəliyinə tutulub və bu qüvvəni bitirmək istəyir. Təbii ki, Cəbhəçilər geriyə bir addım atmır, səngəri tərk etmirlər.
Amma onu da qeyd edim ki, bu dövrün mənfi personajı kimi təkcə rejim deyil, rejimə züy tutanlar da tarixin şilləsin yeyəcəklər.
Repressiyalara Siyavuşlardan, Elmanlardan fərqli münasibət sərgiləməyən, rejimin “bekvakal”ı kimi fəaliyyət göstərən, daxildəki vəziyyətdən yaza bilməyib, xarici siyasətə kleylənən, ədalət və vicdan anlayışı mövsümi xarakrer daşıyan adamlar hansı haqla bizi tənqid edirlər? Belələri bütün şüurlu həyatlarını kolda gizlənən tülkü kimi yaşayıblar. Həmişə ləyaqətli, mübariz insanlara çamur atmağı uğur biliblər.
Çünki ön cəbhədə olmağa cəsarətləri, arxa cəbhədə “ayaqqabı” tikməyə insanlıqları olmayıb. Ancaq “torba” tikməklə başların saxlayıblar.
Bizi səmimi tənqid edənləri alqışlayırıq. Rejimin xoşuna gəlmək üçün deyil, mübarizəyə xələl gəlməməsi üçün canfəşanlıq edənləri qiymətləndiririk.
İndi bu adamlar səmimi olduqların təsdiqləmək üçün, fürsət dəllalarına tərs şillə çəkməyi də bacarmalıdılar. AXCPfobiyadan əziyyət çəkən rejimi “çıldaq” etmək lazım deyil. İnanın ki, Cəbhəçilərin geri çəkilməyi sizə xoşbəxtlik vəd etmir.
AXCP-nin mübarizəsi göz önündədi. Həmişə haqqı pozulanın yanında, zalımın qarşısında olmuşuq.
Ölkəmizi xilas etmək istəyirsizsə, siz də bu daşın altına əlinizi qoyun. Yox, əlinizin əzilməsindən qorxursuzsa, heç olmasa əlləri yaralı adamların ayağına daş atmayın.
Bizim andımız var. Azərbaycanı qanunun üstün olduğu, hamının bərabər olduğu, insanların siyasi, etnik, cinsi mənsubiyyətinə görə sorğulanmadığı ölkəyə çevirmək istəyirik. Hansısa xırda məqamları, xoşagəlməz hadisələri bizim dəyərimiz, təfəkkür tərzimiz kimi “oformut” etməyə çalışmayın.
Bəzi epizodlardan ilhamlanıb, AXCP-ni sarsıtmaq istəyənlərə bir pis xəbərim də var. Cəbhəçilərin siyasi və mənəvi əzasında “diz” yeri yoxdu. Biz diz çökə bilmirik. Ya ayaqüstə qalırıq, ya da ölürük.
Biz bu dövləti, bu vətəni, bu xalqı sevirik. Təkcə özümüzü sevsəydik, nə internetimiz kəsilərdi, nə işgəncəyə məruz qalardıq, nə də gecə-gündüz şər təbliğatının hədəfi olardıq.
Tənqid edəndə də, tərif edəndə də vicdanınızın melodiyasın dinləməyə çalışın.
Biz yıxılmamışıq, baltalamağa həvəslənməyin. Biz həm də sizə görə ayaqdayıq ki, balta qorxusuyla yaşamayasız.
Bu minnət deyil, izahatdı.