တရုတ်နိုင်ငံ မြို့တော် ပေကျင်းမှာ အောက်တိုဘာ ၁၆ ရက်နေ့ကစတင်မယ့် ကွန်မြူပါတီရဲ့ ငါးနှစ်တကြိမ် ညီလာခံကို ကျင်းပဖို့ ပြင်ဆင်နေပါတယ်။

လက်ရှိသမ္မတ ရှီကျင့်ဖျင်ဟာ သူ့ရှေ့က ကွန်မြူနစ်ခေါင်းဆောင်တွေ မယူခဲ့ဘူးတဲ့ တတိယသက်တမ်းကို ယူဖို့ရှိနေပြီး သူဟာ တရုတ်ပြည်ရဲ့ ခေတ်သစ်သမိုင်းမှာ ခေါင်းဆောင်ကြီး မော်စီတုန်းပြီးရင် အာဏာအရှိဆုံးဖြစ်တဲ့ သူ့နေရာမှာ ဆက်ပြီး ထိန်းထားနိုင်ဖို့ သေချာသလောက်ရှိပါတယ်။

အသက် ၆၉ နှစ်ရှိပြီဖြစ်တဲ့ ရှီကျင့်ဖျင်ဟာ လွန်ခဲ့တဲ့ ၁၀ နှစ်ကတည်းက ပါတီရဲ့ အထွေထွေအတွင်းရေးမှူးနေရာကို ရယူချိန်ကစလို့ ပါတီတွင်းက ပြိုင်ဘက်တွေကို ရှင်းလင်းခဲ့သူအဖြစ် သိထားကြပါတယ်။

လာမယ့် ကွန်ဂရက်မှာလည်း သူကပဲ ပါတီထဲက အရေးကြီးတဲ့တာဝန်တွေ သူ့စိတ်ကြိုက် ခန့်ထားတာနဲ့ မူဝါဒပိုင်းတွေကို သူ့စိတ်ကြိုက် ချမှတ်ဖွယ်ရှိတယ်လို့ တရုတ်ရေးရာ အကဲခတ်တွေက သုံးသပ်ကြပါတယ်။

ကွန်မြူနစ်ပါတီတွင်းမှာ ပြိုင်ဘက်ကင်းတဲ့ သမ္မတ ရှီကျင့်ဖျင်ဟာ တတိယသက်တမ်းကို ရယူဖို့ အခက်အခဲ မရှိပေမဲ့လည်း တိုင်းပြည်စီးပွားရေးပြဿနာ၊ ကိုဗစ်ကပ်ဘေး၊ ထိုင်ဝမ်အရေး စိန်ခေါ်မှုတွေ ရှိနေပါတယ်။

ရှီကျင့်ဖျင်ဟာ မော်စီတုန်းအလွန် နှစ်တွေမှာ အာဏာအရှိဆုံး ခေါင်းဆောင်အဖြစ် သူ့အာဏာကို တည်ဆောက်ထားပြီး အခုလာမယ့် အကြိမ် ၂၀ မြောက် ပါတီကွန်ဂရက်မှာ ရှီကျင့်ဖျင်အတွက် တတိယမြောက်သက်တမ်းနဲ့ ခေါင်းဆောင်မှုအသစ်ကို ပြန်လည်ရွေးချယ်မှာ ဖြစ်ပါတယ်။