၂၀၂၂ ကမ္ဘာ့ဖလားဘောလုံးပြိုင်ပွဲရဲ့ နိုဝင်ဘာ ၂၃ ရက်ညပွဲစဉ်တွေ ဆက်လက် ယှဉ်ပြိုင်ကစားကြရာမှာ ဂျပန်၊  စပိန်နဲ့ ဘယ်လ်ဂျီယံအသင်းတွေအနိုင်ရ၊  မော်ရိုကိုနဲ့ ခရိုအေးရှားတို့ သရေကျကာ နာမည်ကြီး  ဂျာမနီအသင်းကတော့ ရှုံးပွဲနဲ့ကြုံတွေ့ခဲ့ရပါတယ်။ 

မနေ့ညနေ အစောပိုင်း အုပ်စု ( E ) ပွဲစဉ်မှာတော့ ဂျာမနီအသင်းနဲ့ အာရှကိုယ်စားပြု ဂျပန်အသင်းတို့ ယှဉ်ပြိုင်ကစားကြရာမှာ ဂျပန်က  ၂ ဂိုး ၁ဂိုးနဲ့ အနိုင်ရသွားပါတယ်။

ဒီပွဲမှာ ဂျာမနီက ဂျပန်ထက် ဘောလုံးပိုင်ဆိုင်မှုရော ဂိုးပေါက်ကန်သွင်းခွင့်တွေမှာပါ အများကြီး အသာရခဲ့ပေမဲ့ ရတဲ့အခွင့်အရေးတွေကို ပိုင်ပိုင်နိုင်နိုင် အသုံးမချနိုင်ဘဲ ပွဲဦးထွက်ရှုံးပွဲနဲ့ ကြုံတွေ့ခဲ့ရတာပါ။

ပွဲချိန် ပထမပိုင်းမှာ ဂျပန်က အဖွင့်ဂိုးသွင်းခွင့်ရခဲ့ပေမဲ့ လူကျွံဘောအဖြစ် သတ်မှတ်ခံရလို့ ဂိုးမရရှိခဲ့ပဲ ဂျာမန်အသင်းရဲ့ မန်စီးတီးကစားသမား ဂန်ဒိုဂန်က ပင်နယ်တီကနေတဆင့် ဂိုးရပြီး   (၁-၀) နဲ့ ဦးဆောင်နေခဲ့ပါတယ်။ ဒုတိယပိုင်းမှာတော့ ဂျပန်အတွက်အနိုင်ဂိုးတွေကို     ပွဲချိန် ၇၅ မိနစ်မှာ ဒိုအန် ၊ ပွဲချိန် ၈၃ မိနစ်မှာ အဆာနိုတို့ကသွင်းယူပေးခဲ့တာဖြစ်ပါတယ်။  

အုပ်စု ( E ) တခြားပွဲစဉ်ဖြစ်တဲ့ စပိန်နဲ့ ကော်စတာရီကာတို့ပွဲစဉ်မှာတော့ စပိန်က  (၇-၀) ဂိုးနဲ့ ဂိုးပြတ်သွင်းပြီး အောင်ပွဲခံခဲ့ပါတယ်။ 

စပိန်အတွက်အနိုင်ဂိုးတွေကိုတော့ ပွဲချိန် ၁၁ မိနစ်မှာ အော်မို၊ ပွဲချိန် ၂၁ မိနစ်မှာ အဆန်စီရို၊ ၅၁ မိနစ် ပင်နယ်တီဂိုးနဲ့ ၅၄ မိနစ်မှာ တောရက်စ်၊ ၇၄ မိနစ်မှာ ဂါဗီ၊ မိနစ် ၉၀ မှာ ဆိုလာ၊ မိနစ် ၉၀ အပြီး နာကျင်အချိန်ပို ၂ မိနစ်မှာ မိုရာတာတို့က အသီးသီးသွင်းယူပေးခဲ့တာပါ။

အုပ်စု (F) အဖွင့်ပွဲစဉ်တွေမှာတော့  မော်ရိုကိုနဲ့ လူကာမိုဒရစ်ဦးဆောင်တဲ့ ခရိုအေးရှားအသင်းတို့ ဂိုးမရှိသရေကျကာ တမှတ်စီ ခွဲယူခဲ့ကြပြီး ဒီဘရိုင်းတို့ရဲ့ ဘယ်လ်ဂျီယံအသင်းနဲ့ ကနေဒါတို့ ပွဲစဉ်မှာတော့  ဘယ်လ်ဂျီယံက (၁-၀) ဂိုးနဲ့ အနိုင် ၃ မှတ်ရသွားပါတယ်။ 

ဒီညပွဲစဉ်တွေအပြီးအမှတ်ပေးဇယား  အုပ်စု (E) မှာ  စပိန်ကအုပ်စုပထမ ၊ ဂျပန်ကအုပ်စု ဒုတိယ၊ ဂျာမနီကတတိယ နေရာမှာရပ်တည်နေပြီး ကော့စတာရီကာကအုပ်စုအောက်ဆုံးမှာ ရှိနေပါတယ်။  အုပ်စု (F) မှာတော့  ဘယ်လ်ဂျီယံအုပ်စု ပထမ၊ ခရိုအေးရှားနဲ့ မော်ရိုကိုက အုပ်စု ဒုတိယနဲ့ တတိယနေရာအသီးသီးမှာ ရပ်တည်နေပြီး  ကနေဒါကတော့ အုပ်စု နောက်ဆုံးမှာ ရှိနေပါတယ်။