Siyasi fəal Bəxtiyar Hacıyev
AXCP sədri Əli Kərimlinin mühafizəçisini həbs edib, terroru maliyələşdirməkdə ittiham ediblər, cinayət işi açıblar, onu 10 ildən 14 ilə qədər həbs gözləyir. Bundan başqa Əli Kərimlinin evindəki TV-ni təmir etməyə gedən adi bir ustanı da 30 günlük həbs ediblər. Buna bənzər təzyiqlər, həbs xəbərləri gündəlik gəlir.
AXCP-ni və Əli Kərimlini bəyənə də bilərik, bəyənməyə də. Ritorikalarını sevə də bilərik, sevməyə də. Milli Şura iclaslarında danışılanlara gülə də bilərik, təəssüf edə də. Nə bilim, tənqid edə də bilərik, dəstəkləyə də.
Amma bütün bunlar günahsız insanların aylarının və illərinin haqsız olaraq həbsdə keçirməsinə heç bir halda bəraət qazandırmamalıdır. Eləcə də bizim susqunluğumuza. İnsan bir müxalif liderin yanında durub deyə ona “terrorçu” damğası vurub, 10 il həbsə atarlar? Hansısa usta müxalif partiya sədrinin TV cihazını təmir etmək istəyirsə, onu 30 gün həbsə atarlar? Ayıb deyil? Bu nə kindir, bu nə düşmanlıqdır siyasi mübarizədə?
Özünə müxalif deyən siyasi partiyaların rəhbərliklərinin susqunluqlarına hələ gülməli bəhanələr tapmaqları nə deməkdir?
Nəinki AXCP, hətta YAP üzvü də şərlənsə, ona qarşı çıxmalıdır hamı. Söhbət insan həyatından gedir, qanunsuz həbsdən, işgəncədən gedir axı.
P.S: Bu gün edilən haqsızlıqlara susmağımız bu haqsızlıqların miqyasını genişləndirə-genişləndirə gedəcək və əmin olun ki, bir gün sizin də qapınızı döyəcək.